Pyrshah ka PADC ïa ka jingthmu buh Weigh Bridge ha Narang

Nongpoh, Naitung 9: Kum ka dak jong ka jingpyrshah ban buh ïa ka weigh bridge, ka Pahammawleiň Area Development Committee hynne ka sngi ki la aiti da ka jingthoh sha ka Deputy Commissioner jong ka Ri Bhoi, ka Kong RM Kurbah.

Ka Pahammawleiň Area Development Committee kadei ka synjuk jong ki Rangbah Shnong ba kynthup ia ki ar phew tylli ki shnong.

Ha ka jingthoh, kane ka committee ka la pynpaw ia ka jingpyrshah jur halor ka jingtei ia ka Weigh Bridge hapoh jong ka shnong Narang kaba dang iaid shaid shaid mynta.

Ki nongialam ba hakhmat jong katei ka synjuk ba kynthup ia u President, Bah CT Nongrum bad u Secretary, Bah T. Namsaw ha ka jingthoh sha ka Deputy Commissioner jong ka Ri Bhoi ki la dawa ban nym ailad ba katei Weigh Bridge kan ieng namar kadei ka jaka kaba bun ki ing ki sem, bad kan wanrah ia shibun ki jingeh ia ki paidbah nongshong shnong lada katei ka Weigh Bridge kan plie lashai la shi sngi.

Ki la pynpaw ba ki jingeh ba hakhmat ba ki paidbah nongshong shnong kin ia kynduh kan long ka jingpynjaboh ia ka shnong ka thaw, ka jingthut ha ka thiah ka dem na ka jingsawa jong ki trok, ka jingiakajia kumba la ju iohi na ka por sha ka por ha ki Weigh Bridge kiba rim, ka jingiadih iabam bad ka jingia hylla da ki ktien kiba khlem akor bad kiwei kiwei bad kane hi kan wanrah ia ka jingshong syier hapoh shnong poh thaw khamtam eh ia ki khyllung khynnah. Ki la buh ruh ia ka jingkylli ba mano ban bahkhlieh lada kan wan jia kaei kaei kaba sngewsih ia ki paidbah nongshong shnong?

Ki nongialam ki la pynpaw ruh kumba la iohi na ka jingtei ia katei ka Weigh Bridge mynta, kam shym la don satia kano kano ka surok ban rung sha katei ka Weigh Bridge, hynrei la shu pyndonkam da ka surok jong ka shnong Narang kaba la shna da ka tnad PWD jong ka sokar jylla kaba long ka jingpyndonkam bakla katkum ka kyndon surok jong ka sorkar jylla.

“Kumba la bthah da ka National Highway Authority of India (NHAI) ba kino kino ki jingtei kiba ktah ia ka jingleit suk wansuk jong ki kali ha u surok bah kim dei satia ban don hapoh 1 kilomitar na ka jaka khrong khajna (Toll Plaza), katba kane ka Weigh Bridge kaba dang tei shaid shaid mynta kadei kaba hap tang hapoh 500 mitar na ka jaka khrong khajna (Toll Plaza)” ong ki nongialam katei ka synjuk.

Halor kane ka bynta, na ka liang ka synjuk ka la buh ia ka jingkyrpad ia ki bor pyniaid District ban pynsangeh shisyndon ia ka jingtei ia katei ka Weigh Bridge bad ban wad pat da ki kiwei ki jaka kiba kham pajih bad kham biang khnang ba ki paidbah nongshong shnong kin nym ngat ha ka jingeh hadien habud.

Image: Avery Weigh Tronix

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589